“Nchi za Asia hazisaidii ipasavyo kupambana na Ebola”

Benki ya Dunia imesema kuwa nchi za Asia zimeshindwa kutoa msaada wa kutosha katika mapambano ya kimataifa dhidi ya Ebola, licha ya kuwa na wafanyakazi wa kutosha wenye ujuzi wa sekta ya tiba. Hayo yameelezwa Jumanne hii na Jim Yong Kim, Mkuu wa Benki ya Dunia katika mkutano na vyombo vya habari huko Seoul mji mkuu wa Korea ya Kusini. Kim amewataka viongozi wa nchi za Asia kutuma wataalamu wa afya huko Liberia, Guinea na Sierra Leone, ambako  mlipuko wa homa ya Ebola umeua watu karibu ya elfu tano.

Mkuu wa Benki ya Dunia ameongeza kuwa, na hapa ninamnukuu" tunahitaji maelfu ya wafanyakazi wa huduma za afya, na tutaendelea kuwahitajia katika kipindi cha zaidi ya miezi sita ijayo. Mapambano dhidi ya Ebola hayajakwisha hadi kutakapokuwa hakuna kesi yoyote katika nchi hizo tatu",mwisho wa kunukuu.